Stuttar ferðir

Við byrjum í reiðhöllinni og ríðum þaðan eftir þægilegum reiðgötum í nágrenni Kálfholts. Foreldrar eru velkomnir með, ýmist gangandi eða ríðandi. Einhver verður jú að taka myndir! Börn sem hafa farið á reiðnámskeið eða eru hestvön ríða ein en teymt er undir þeim reynsluminni. Á eftir fá börnin að kemba hestunum og hver veit nema kötturinn Hallgerður Loppa og hundurinn Embla séu líka heimavið.

Við ríðum á hægu tölti frá Kálfholti með bökkum Þjórsár. Fögur fjallasýn, niður árinnar, hryssurnar, stóðhestarnir og folöldin leikandi allt í kring – allt spilar þetta saman og gerir upplifunina ógleymanlega. Að reiðtúr loknum er boðið upp á heimabakað góðgæti.

Fimm tíma ferð, aðeins fyrir vana reiðmenn. Við ríðum um 20 km leið á láglendi og utan vega með bökkum Þjórsár. Riðið er um mjúkar og góðar götur sem henta vel til töltreiðar og menn og hestar njóta sín vel. Á miðri leið er áð og hádegisnesti snætt.